.من لهؤلاء الاطفال؟؟؟

ده محمود او(نور الدين محمود) زى ما مامته بتناديه (ربنا يحفظه ويبارك فيه)

حبيب قلبى وابن أختى وصديقتى التى تكبرنى ب6 سنوات (علاقتنا قوية جدا ربنا يديمها فى طاعته.. )

فى يوم من 3شهور كنت رايحة لها واول مابروح بستلم محمود ولا يمكن اتنازل عنه لاى حد لو كان معايا حد فى زيارتها ...وهى بترحب بشدة

لكن اليوم ده وشها كان متغير اوى وماسكة فيه وحاضناه ...مش راضية تسيبه لحد ..تصب الشاى وهو فى ايدها برضه .وانا عمالة أسال نفسى فى ايه ؟؟؟

انا لسه جاية م الكلية ياترى فى حاجة حصلت له النهاردة ؟؟؟

لقيتها بتقلى فى غارات على غزة (انا عارفة ده وبتألم وبتحصلى الحالة دى كتير ..هونى على نفسك )

فى طفل عنده 5شهور رضيع وحيد امه وابوه بعد 5 سنوات ماااااااات (لا حول ولا قوة الا بالله)

رجعت بيتنا وشفت قناة الاقصى ولن انسى هذه الصورة ماحيييت

محمد البرعى

وافتكرت محمود ومامته

وقعدت ادعى لأم محمد البرعى ربنا يصبرها ويهون عليها

ياترى كام طفل فى غزة حصل له كده ..ياترى كام أم فقدت ابنها ؟؟؟..كام أب فقد ابنه ؟؟؟

الحصار عمال بيحصد فى الارواح والنهاردة كانت الضحية 187 من المرضى وكانت مصرية (كمان يامصر حتى ضناك ..بترفضى تساعديه ..ده باعتبار انه خاين انه راح عاش فى فلسطين ولا ايه ؟؟

ليه بتعملى كده فى ولادك واخوات ولادك من فلسطين ؟؟؟

عارفين انه تلت ضحايا الحصار من الاطفال ومعظمهم من المواليد الجدد

ياترى مين لهؤلاء الاطفال؟؟؟

ووزارة الصحة فى فلسطين بتؤكد أن أكثر من 400 حالة مرضية من أطفال غزة دخلوا المستشفيات في الفترة الأخيرة جراء تدهور حالتهم الصحية والنفسية نتيجة نقص كافة المستلزمات الطبية والأغذية من حليب وطعام صحي.

وأشارت إلى أن العام الماضي شهد دخول أكثر من 1600 حالة مرضية من الأطفال إلى مستشفيات القطاع، نتيجة إصابتهم بأمراض فقر الدم والكساح وغيرها من الأمراض الجديدة الناجمة عن النقص الهائل في التغذية وانتشار الأوبئة وخلو المرافق الطبية من الدواء والمستلزمات العلاجية، وخاصة أجهزة الحاضنات الخاصة بالأطفال المولدين حديثاً وتلك الأجهزة الخاصة بعملية التنفس الاصطناعى...

ده ان وجدوا عربيات وكانوا قريبين من غزة وراحوا للمسشتفيات ووجدوا ماينتظرهم بداخلها أيضا من نقص خدمات العلاج

ام لو كانوا من أطفال المخيمات فربنا يتولاهم برحمته

معاذ طفل من مخيم البريج عنده سنتين

فى يوم بكلم اختى وصديقتى الغزاوية من مخيم البريج عالنت لاقيتها بتقلى معاذ ابن اخويا تعبان اوى وحرارته مرتفعة ووبيكح مش عارفين نعمله ايه ..طب ودوه لدكتور ..لمستشفى قالت لى كل ده مش هنا لازم نروح غزة واحنا بالليل

طيب هتسألونى فين والده

والده د/جهاد عنده 26 سنة

طبيب أطفال أصلا

لكن فى الاسر (ربنا يفك أسره ويرجعه لابنه) من سنتين يعنى ممكن ميكونش شاف ابنه أصلا لانهم مانعين الزيارات وحتى الجوابات مش بتوصل الا كل فين وفين ..

معاذ حرارته بتزيد..

اتصرفى اعملى له كمادات ومع انى فى طب وعارفة أدوية خافضة للحرارة لكن موصفتش وباعتمد المبدأ ده فى حياتى لحد ماتخرج واتخصص ان شاء الله وحتى لو وصفت مفيش أدوية فى المخيم ..ولا فى القطاع

ممكن تجربى اعشاب جربى ورق جوافة فى عطار عندكم ؟؟

الحصار خلص على كل حاجة المحلات فاضية

طيب جربى نعناع

قالت الحمد لله عندنا زرعة نعناع فى البيت ؟؟

وبعد يومين سألتها معاذ عامل ايه ؟؟

قالت الحمد لله بقى كويس الوقتى (طبعا عناية ربنا ورحمته)

لكن فى أطفال تانيين (ربنا يحفظ كل الاطفال يارب ويحفظنا ) عندهم سرطان وامراض القلب وغيره من الامراض المزمنة وجرحى بسبب القصف وصورهم بنشوفها على قناة الاقصى وبنسمع صرخاتهم

ياترى من لهؤلاء الاطفال بعد الله ؟؟؟

محمود الوقتى بقا عنده 9 شهور (ربنا يحفظه ويبارك فى عمره ويحميه ويجعله من امثال نور الدين محمود وينصر كل فلسطين وأطفالها ) امبارح كان عندنا والكل حواليه وامى كانت عاملة مهلبية بالكاستر وكان بياكل منها ومبسوط اوى ولما بيتعب بيلاقى مامته وباباه الاتنين دكاترة وبيلاقى فى بلده دواء ..بيسمع طيور الجنة والاناشيد ولما يتردد ان نشيد منهم يلتفت ويضحك . الحمدلله انه.مش بيسمع صوت قصف باستمرار...

ياترى أطفال فلسطين مش نفسهم فى عيشة زى عيشة اى طفل عندنا ؟؟؟

هل انا و انتم يمكن ان نقدم لهم شيئا ؟؟؟