ليه يا مصـــر؟!

الأخوة الكرام ؛؛
الأخوات الكريمات؛؛

السلام عليكم ورحمة الله وبركاته



ليه يا مصـــــــــر؟؟!!
تلك قصيدتى الجديدة وليست آخر ما كتبت..لكنها لها وضع خاص
لأول مرة أكتب وأنا بحاول أمنع نفسى من الكتابة ..صور كتير كانت بتجى على بالى
بلسان المصريين ولسان أهل غزة وأطفالها ..لكن كنت بمنع نفسى أن أكتبها..
ومش هكتب ختام للقصيدة ويارب مصر فى يوم تكتبه..


ليه يا مصر ؟!
تسمحيلهم
يجرحونا ..
ويجرحوكى
وإنتِ ليكى تاريخ وجاه

ليه يامصر ؟!
تسمحيلهم
يقتلونا ..
ويقتلوكى
وإنتِ شريان الحياه.

ليه يامصر؟!
تسمعيلهم
دول قلوبهم من فولاذ
وإنتِ قلبك عمره مرة
ما كان حجر
أو لوح قزاز

دا إنتِ نبض العزة فينا
والحنان..
وإنتِ قلبك طول حياتك
للجيران..
دا احنا دايبين فيكى دوب
ليه تدوسى ع القلوب.


ليه تخلى النيل حزين
من فعالك
يبكى غرقان بالدموع
ليه تخلى نهارنا حالك

ليه يامصر؟!
تقطعى حبل الوصال
بين الحبايب
تبنى ويا السور جدار
والإغاثة فرض غايب ..

ليه يامصر؟!
وإنتِ أذكى الأذكياء
وإنتِ مكر عمرو
وإنتِ .. أم الدهاء
الفظى الخاين
بيعيه
واشتريلك أوفياء..



لم تتم بعد
9/1/2010
12:30 صباحا